phir pesh e nazar sorat e mahtab ha koi
ya meri nigaho'n men naya khab ha koi

ye bat gara'n khab ko ab kon bataye
terey liye is rat men bekhab ha koi

palkon pe jo roshan ha sar e sham e tamanna
wo ashk nahi gohar e nayab ha koi

ye sirf karisma ha meri chasm e talab ka
sehra men kahan gulshan e shadab ha koi

dunya k sahifey men meri zat bhi shayad
aalam o masa'ib ka naya bab ha koi

nawaqif e aadab e mohabbat ko khabar kya
kab se rah e umeed men betab ha koi

ye kis ki judai men teri aankh se yawar
din rat rawa'n moja e kho'n nab ha koi.

Yawar azeem.

NOTE: Is ghazal k kuch ashaar par janab Amjad islam amjad ne mujhey sargodha k aik mushairey men bohat dad di. ilawa az een ye ghazal Farhat abbas shah aur asad aawan k sheri intikhab "101 nojawan shayer" , janab Baqi Ahmad pori k intikhab "Ghazal fehmi" aur Arshad malik k intikhab "Roop nagar ki rani ho tum" men shamil ha jis par men in hazrat ka aur Allah pak ka shukar guzar hon.